Kryetari i Mitrovicës, Faton Peci, ka reaguar pas aksidentit të rëndë të trafikut në fshatin Smrekonicë, ku humbën jetën dy të rinj nga Komuna e Mitrovicës.
Peci ka shprehur dhimbjen e tij për rastin tragjik, duke thënë se humbja e dy të rinjve është një dhimbje për të gjithë qytetin.
“Jam thellësisht i prekur me rastin tragjik të aksidentit të sotëm që i mori jetën dy të rinjve të Komunës së Mitrovicës në moshë shumë të re”, ka shkruar Peci.
Ai u ka shprehur ngushëllime familjeve Xhemajli dhe Zejnullahu për humbjen e të afërmve të tyre, Qëndrimit dhe Rinorit.
“Kjo humbje nuk është humbje vetëm për familjet e të afërmit, por për gjithë qytetin. Shpirti i tyre u prehtë në paqe, e kujtimi për ta qoftë i përjetshëm!”, ka shkruar ai.
