Komuna e Prishtinës ka dalë me njoftim për qytetarët lidhur për ndryshimet e motit që pritet të ndodhin dhe për rreziqet potenciale që mund të paraqesin erërat e forta, rrëbeshet e shiut e rrufetë.
Drejtoria për Siguri dhe Emergjenca njofton qytetarët e Prishtinës se pas një periudhe të zgjatur me temperatura jashtëzakonisht të larta dhe mot të nxehtë, pritet një ndryshim i fuqishëm i kushteve atmosferike, i cili do të ndikojë edhe në vendin tonë.
“Sipas parashikimeve ndërkombëtare, masa të ftohta dhe të fuqishme ajrore pritet të depërtojnë nga veriperëndimi i kontinentit, duke përfshirë fillimisht disa shtete të Evropës si: Veriu i Italisë, Sllovenia, Kroacia, Bosnje dhe Hercegovina, Hungaria, Sllovakia, Polonia, Ukraina dhe Rumania, ku do të shënohen rrebeshe të fuqishme shiu, shkarkesa të rrezikshme rrufesh dhe erëra të forta me shpejtësi deri në 130 km/h – me potencial për pasoja serioze.
“Në kryeqytet e marta do të mbetet ende nën ndikimin e masave të nxehta, por pasdite pritet shtim i vranësirave dhe rrebeshe lokale shiu, rrufe dhe erëra deri në 70 km/h.
Nga e mërkura, një front i fuqishëm i ftohtë do të sjellë ulje të menjëhershme të temperaturave (deri në 20°C më pak), reshje shiu dhe mot të paqëndrueshëm.
E enjtja do të jetë me vranësira të shpeshta dhe temperatura më të ulëta se zakonisht.
E premtja, vjen me stabilizim gradual dhe ngritje të lehtë të temperaturave, por nën 30°C”, njofton komuna.
Tutje ky institucion ka dhënë rekomandime për qytetarët e Prishtinës:
“Qëndroni të informuar për paralajmërimet nga institucionet dhe mediat zyrtare. Mos qëndroni në ambiente të hapura gjatë stuhive dhe rrufesë. Siguroni objektet e jashtme që mund të dëmtohen nga era. Kujdes i shtuar për të moshuarit dhe fëmijët gjatë ndryshimeve të papritura të motit. Mos parkoni nën pemë apo objekte të rrezikshme”, thuhet në njoftim.
