Papa Françesku ka përshëndetur publikun në Vatikan, dy javë pasi u lirua nga spitali ku po merrte trajtim pas problemeve me rrugët e frymëmarrjes. Papa 88-vjeçar dukej se e kishte të vështirë të fliste dhe kishte një kateter nazal në hundë për t’i siguruar oksigjen.
Udhëheqësi shpirtëror i katolikëve dhe kreu i Shtetit të Vatikanit, Papa Françesku, ka dalë sot për herë të parë në Sheshin e Shën Pjetrit në Vatikan pas sëmundjes së tij të rrugëve të frymëmarrjes, duke përshëndetur besimtarët.
Një surprizë ndodhi gjatë pjesës së fundit të ceremonisë së sotme në Vatikan, e organizuar për pacientët dhe punonjësit e sektorit shëndetësor në kuadër të “Jubileut” tradicional, i cili festohet nga bota katolike çdo 25 vjet.
Papa Françesku, i cili u trajtua për bronshit të rëndë për 38 ditë në Spitalin Gemelli në Romë dhe u lirua më 23 mars, ndërsa aktualisht është në fazën e rikuperimit, doli sot për herë të parë në Sheshin e Shën Pjetrit pas sëmundjes.
Papa 88-vjeçar, i cili u soll në shesh me karrocë invalidore, përshëndeti turmën dhe tha: “Të gjithëve një të dielë të mirë. Ju faleminderit shumë.”
U vërejt se Papa e kishte të vështirë të fliste dhe kishte një kateter nazal në hundë për t’i siguruar oksigjen.
Ndërkohë, për shkak të së dielës, Vatikani publikoi gjithashtu me shkrim mesazhin e Papa Françeskut pas lutjes tradicionale të së dielës.
Në mesazhin e tij, Papa tha: “Të vazhdojmë të lutemi për paqe në Ukrainë, ku ka pasur sulme që kanë marrë jetën e shumë civilëve, përfshirë fëmijë. E njëjta gjë po ndodh në Gaza.
Njerëzit detyrohen të jetojnë në kushte të paimagjinueshme, pa strehë, pa ushqim, pa ujë të pastër. Le të pushojnë armët, le të fillojë dialogu. Të gjithë pengjet duhet të lirohen dhe popullit duhet t’i jepet ndihmë.”
Papa gjithashtu dënoi dhunën ndaj punonjësve shëndetësorë në mesazhin e tij për ceremoninë në Vatikan.
