Presidentja e Kosovës, Vjosa Osmani, ka mbajtur një fjalim para mijëra pjesëmarrësve në Lutjet e Mëngjesit, një ngjarje e organizuar nga Kongresi amerikan në Washington, duke theksuar rolin e besimit në udhëtimin e Kosovës drejt lirisë.
“Jam këtu në emër të një kombi mirënjohës, Republikës së Kosovës. Kam nderin të përfaqësoj një popull, udhëtimi i të cilit drejt lirisë dhe paqes është udhëhequr gjithmonë nga besimi”, deklaroi Osmani.
Presidentja vuri në dukje se kjo mbledhje, e cila organizohet që nga viti 1953, ka luajtur një rol të rëndësishëm në promovimin e dialogut dhe unitetit, duke u bërë një provë e vlerave të përbashkëta që tejkalojnë dallimet politike, kombëtare, ideologjike apo fetare.
Ajo theksoi se fëmijëria e saj nuk ishte e zakonshme për një politikan, pasi ajo u rrit si një fëmijë lufte në një vend të shkatërruar nga një regjim i verbuar nga urrejtja.
“Netët e fëmijërisë sime nuk ishin të mbushura me përralla para gjumit, por me jehonën e vazhdueshme të luftës”.
Osmani kujtoi fjalët e prindërve të saj në momentet më të vështira: “Kemi besim. Kemi besim. Sepse Zoti është streha dhe forca jonë”.
Ajo tha se edhe kur u bënë viktima të një regjimi gjenocidal, besimi nuk i braktisi kurrë.
Presidentja e Kosovës vlerësoi rolin e Shteteve të Bashkuara në shpëtimin e popullit të saj: “Ne iu lutëm Zotit për një mrekulli. Ne iu lutëm Zotit të na shpëtonte. Dhe Zoti na dërgoi Amerikën. Jetët tona, jetët e njerëzve të Kosovës, u shpëtuan nga burra dhe gra të guximshëm nën uniformën e ushtrisë së Shteteve të Bashkuara të Amerikës, bashkë me çlirimtarët tanë dhe kombet e tjera të botës”, deklaroi Osmani.
Presidentja Osmani tha se Amerika udhëhoqi rrugën dhe bota demokratike e ndoqi në mbështetje të lirisë së Kosovës
Sipas saj edhe Presidenti Rugova, shpesh thoshte: “Ne kemi besuar tek Zoti dhe ky besim na ka mbajtur gjallë”. Fjalët e tij pasqyrojnë jo vetëm një besim personal, por një të vërtetë kombëtare – që kur përballeshim me shtypjen, besimi ynë në Zot, në liri e drejtësi dhe në kauzën tonë na çoi përpara.
Fjalimi i Presidentes Osmani u prit me duartrokitje dhe respekt, duke theksuar lidhjet e forta midis Kosovës dhe Shteteve të Bashkuara, si dhe rëndësinë e besimit dhe shpresës në kundërshtimin e sfidave më të mëdha.
