Ambasadori i ri i BE-së në Kosovë, Aivo Orav, është takuar me emisarin e BE-së për dialogun Kosovë-Serbi, Miroslav Lajçak.
Orav dhe Lajçak drekuan së bashku, ku folën për zhvillimet e fundit politike dhe të sigurisë.
“Kënaqësi të takohesha sot me përfaqësuesin special të BE-së, Miroslav Lajcak, për të diskutuar mbi zhvillimet e fundit politike dhe të sigurisë.
Si përfaqësues special i BE-së në Kosovë, pres me padurim të bashkëpunoj me të gjithë aktorët e familjes së BE-së për të forcuar qasjen “Team Europe” në terren” shkroi Orav në një postim.
Gjatë ditës, Lajçak u takua edhe me zëvendëskryeministrin e Kosovës, Besnik Bislimi.
Pas takimit, Lajçak shkroi se kanë pasur një bisedë të hapur dhe të detajuar për takimin e radhës të shefave të ekipeve negociatore.
Emisari sllovak ka treguar gjithashtu se kanë biseduar edhe për Planin e Rritjes dhe për hapat e radhës në Dialog në periudhën e ardhshme.
