Autoritetet holandeze kanë shtuar masat e sigurisë në Hagë, në pritje të protestës së paralajmëruar nga mërgata shqiptare, e cila pritet të nisë sot nga ora 14:00.
Forcat policore u kanë ndaluar protestuesve që të qëndrojnë përpara selisë së Gjykatës Speciale, duke i drejtuar ata në lokacionin e caktuar për protestë. Përgjatë rrugës ku marshuan protestuesit, shihen një numër i madh efektivësh policorë, ndërsa janë vendosur edhe bllokada në disa rrugë përreth ndërtesës së Gjykatës.
Kujtojmë se organizatori Fatmir Koci ditë më parë kishte thënë se autoritetet holandeze nuk kanë dhënë leje që protesta të mbahet afër objektit të Gjykatës Speciale, por është lejuar që ajo të zhvillohet në një park të caktuar, pak më larg ndërtesës.
