Kryeministri i Kosovës, Albin Kurti, gjatë mbledhjes së Qeverisë ka thënë se gjatë muajit mars Kosova kujton qindra masakra të kryera mbi popullsinë civile.
“Dy ditë para marsit kujtuam dhe bëmë homazhe para dëshmorëve në Likoshan e Qirez. Tash në mars kujtojmë masakrën e Krushës së Madhe, të familjes Berisha, masakrën e Izbicës, masakrën e familjes Bogujevcit dhe masakrën e Pastasellit. Përkulemi me nderim të përjetshëm para atyre që u flijuan”, ka thënë ai të martën.
Gjatë mbledhjes është miratuar kërkesa e Ministrisë së Mbrojtjes për marrje në shfrytëzim të pronave për nevoja të Ministrisë dhe Forcës së Sigurisë së Kosovës (FSK).
“Pronat që kërkojmë t’i marrim në shfrytëzim janë prona të Republikës së Kosovës Dumosh, Radujekë, Racubek..”, ka shtuar ministri Ejup Maqedonci.
