Presidenti i SHBA-së, Donald Trump, nxori një copë letër nga xhaketa e tij gjatë një paraqitjeje në emisionin “60 Minutes” të CBS.
Letra përmbante një listë me tetë luftëra që Trump pretendon se i ka përfunduar.
“Solla një listë. Shikojeni këtë. Luftëra. Sa prej tyre kam zgjidhur. Kamboxhia dhe Tajlanda. Kosova dhe Serbia. Kongo dhe Ruanda. Pakistani dhe India. Ata rrëzuan shtatë aeroplanë. Izraeli dhe Irani, a keni dëgjuar për këtë? Egjipti dhe Etiopia. Etiopia ndërtoi një digë të madhe. Armenia dhe Azerbajxhani. Dhe nëse shikoni, Izraeli dhe Hamasi, që është, e dini, një situatë e vështirë”, tha Trump.
“Kam zgjidhur tetë nga nëntë luftëra. E dini si i zgjidha. Në 60% të rasteve, ju thashë nëse nuk ndaloni së luftuari, do të vendos tarifa mbi vendet tuaja dhe nuk do të jeni në gjendje të bëni biznes me SHBA-në”, shtoi ai.
Prezantuesja Norah O’Donnell e pyeti pse taktika të tilla nuk funksionojnë me presidentin rus Vladimir Putin.
“Mendoj se funksionon me Putinin. Unë u solla ndryshe me të sepse nuk bëjmë shumë biznes me Rusinë, e dini? Ai nuk është dikush që blen shumë nga ne. Por mendoj se do t’i pëlqente. Mendoj se ai dëshiron të vijë dhe dëshiron të tregtojë me ne dhe dëshiron të fitojë shumë para për Rusinë. Më pëlqen kjo”, u përgjigj ai.
Prezantuesja ishte e interesuar nëse mund të arrinte një marrëveshje me Putinin në muajt e ardhshëm.
“Mendoj se do ta bëjmë, po. Mendoj se ai me të vërtetë dëshiron të bëjë biznes me SHBA-në. Funksionoi me Indinë, funksionoi me Pakistanin dhe funksionoi me 60% të këtyre vendeve. Mund t’ju them, nëse nuk do të ishin tarifat dhe tregtia, nuk do të isha në gjendje të bëja biznes”, theksoi Trump.
