Në Kosovë kanë arritur 85 mijë doza të vaksinave kundër gripit sezonal dhe nga java e ardhshme do të fillojë vaksinimi për qytetarë në të gjitha qendrat e Mjekësisë Familjare. Zyrtarë nga institucionet shëndetësore të imunizimit, u kanë bërë thirrje qytetarëve, sidomos personave më të moshuar, që të vaksinohen për t’u mbrojtur nga gripi sezonal.
Në të gjitha qendrat e Mjekësisë Familjare, nga java e ardhshme do të fillojë vaksinimi kundër gripit sezonal. Kërkesat për t’u vaksinuar janë të mëdha, sidomos nga moshat e shtyra. Qytetarët theksojnë për Radio Kosovën se presin që të vaksinohen shumë shpejt me vaksinat kundër gripit sezonal.
“Vjet e kam marr e sivjet ende jo. Unë përherë e marr vaksinën kundër gripit sezonal” – “Jo, ende nuk e kam marr. Po pres të vaksinohem këto ditë” – “I kam marr gjithmonë. Ka 6-7 vjet që vaksinohem. Sivjet akoma nuk jam vaksinuar. Do të vaksinohem sepse po më mbron nga gripat”. Këto janë disa nga deklaratat e qytetarëve të pyetur nga Radio Kosova nëse do të vaksinohen kundër gripit sezonal.
E Faik Hoti, nga Instituti i Shëndetit Publik, theksoi për Radio Kosovën se program i vaksinimit sivjet nis më herët dhe shkalla e mbulueshmërisë për vaksinim kundër gripit sezonal do të jetë më e lartë. Sipas tij, qytetarët do të kenë mundësi të marrin më herët vaksinën dhe ta krijojnë imunitetin e mjaftueshëm për ta parandaluar gripin.
“Që nga java e ardhshme qytetarët, e posaçërisht grupet e rrezikut siç janë: të moshuarit, gratë shtatzëna dhe fëmijët me indikacionet që mund të vaksinohen, nga e hëna e tutje mund të fillojnë të vaksinohen me vaksina kundër gripit sezonal. Për këtë vit kemi siguruar 85 mijë doza të kësaj vaksine e që janë të mjaftueshme”, tha ai.
Edhe nga Ministria e Shëndetësisë kanë konfirmuar se vaksinat tashmë kanë arritur dhe nga java e ardhshme këto doza do të jepen për qytetarët në të gjitha komunat e Kosovës. Vaksinimi kundër gripit sezonal mund të bëhet çdo ditë pune në njësitë e vaksinimit, në kuadër të qendrave kryesore të Mjekësisë Familjare në çdo komunë.
