Është shtyrë për herë të dytë intervistimi i kryetarit të Listës Serbe, Zlatan Elek, lidhur me rolin e tij në organizimin e barrikadave në veri të Kosovës dy vjet më parë.
Shtyrja është bërë me kërkesë të mbrojtjes, për shkak të arsyeve shëndetësore të avokatit të tij.
Lajmin e ka konfirmuar zëdhënësja e Prokurorisë Speciale të Kosovës, Arbnora Luta.
“Zlatan Elek është ftuar për intervistim në kuadër të hetimeve që Prokuroria Speciale është duke i zhvilluar për vendosjen e barrikadave në pjesën veriore të Kosovës në vitin 2022. Ai dyshohet për veprat penale: pengim i personit zyrtar në kryerjen e detyrave zyrtare, thirrje për rezistencë dhe bashkim për veprimtari kundërkushtetuese. Intervistimi është shtyrë me kërkesë të mbrojtjes për një datë tjetër për arsye shëndetësore të avokatit të tij”, deklaroi Luta.
Nga Lista Serbe kanë konfirmuar se Elek do t’i përgjigjet pozitivisht thirrjes së Prokurorisë, duke e cilësuar atë si të motivuar politikisht.
“Thirrjes Elek i përgjigjet si kryetar i Listës Serbe, kirurg pediatër i respektuar dhe njeri i ndershëm, thellësisht i vetëdijshëm për pastërtinë e tij juridike dhe morale, sepse nuk ka kryer asnjë vepër të kundërligjshme”, thuhet në reagimin e Listës Serbe.
Edhe Zyra për Kosovën në Qeverinë e Serbisë ka reaguar, duke e cilësuar këtë proces si të montuar politikisht dhe të drejtuar kundër serbëve në Kosovë.
Përveç Elekut, ftesë për intervistim kanë marrë edhe përfaqësues të tjerë të Listës Serbe, përfshirë deputetët Igor Simiq dhe Slavko Simiq.
Ngjarjet lidhen me dhjetorin e vitit 2022, kur protestues serbë bllokuan rrugët në veri të vendit në shenjë kundërshtimi ndaj vendimit të Qeverisë së Kosovës për të mos lejuar qarkullimin e automjeteve me targa ilegale të Serbisë.
Po ashtu, Prokuroria Themelore në Mitrovicë ka ngritur aktakuzë ndaj deputetit Slavko Simiq për një tjetër rast që lidhet me sulmin ndaj gazetarëve në Leposaviq në vitin 2023.
