Nesër duke filluar nga ora 10:00 do të mbahet Provimi i Maturës Shtetërore, të cilit provim do t’i nënshtrohen 18.800 maturantë, kurse, sipas MASHTI-t, rezultatet do të bëhen publike më së largu deri më 30 qershor
“MASHTI ka ndërmarrë të gjitha veprimet e duhura për organizimin e provimit, duke angazhuar dhe përgatitur trupa të ndryshëm mbikëqyrës, të cilët janë të obliguar të sigurojnë zhvillimin e mbarë e korrekt të procesit”, thuhet në njoftim.
MASHTI u ka bërë thirrje të gjithë maturantëve që t’u përmbahen rregullave të përcaktuara, si: mosmbajtja me vete e telefonave apo pajisjeve të tjera elektronike, pasi me to nuk do të lejohet hyrja në qendrat e testimit, në mënyrë që, sipas tyre, të sigurohet një proces i drejtë, i rregullt e i besueshëm.
Ministria, gjithashtu njofton se, hyrja në qendrën e testimit do të mbyllet në ora 10:00. Pas kësaj ore, kanë bërë të ditur se nuk do të lejohet hyrja e asnjë personi të paautorizuar nga MASHTI deri në përfundimin e testit.
“MASHTI ka angazhuar gjithashtu trupa lëvizëse dhe ekspertë të IT-së për të monitoruar nga afër dhe nga distanca mbarëvajtjen e procesit. Çdo përpjekje për të dëmtuar apo shkelur rregullat e përcaktuara do të trajtohet me masa të menjëhershme ligjore”, thuhet në njoftimin e kësaj ministrie për Provimin e Maturës Shtetërore.
