Ministria e Arsimit, e udhëhequr nga ministrja në detyrë Arbërie Nagavci, ka shpallur sot një tender për ndërtimin e 5 shkollave të reja në disa Komuna të Kosovës. Vlera e përgjithshme që ministria i ka paraparë arrin mbi 17 milionë euro.
Njoftimet janë publikuar sot në platformën E-prokurimi, ndërsa afati për dorëzimin e ofertave është, më 7 korrik 2025.
Sipas të dhënave, këto janë komunat që do të përfitojnë nga këto projekte.
Për ndërtimin e Shkollës Fillore të Mesme të Ulët në Demjan në Gjakovë ministria ka planifikuar buxhet 2.5 milionë euro.
Ndërtimi i shkollës fillore 9+1 në Doganaj, Kaçanik janë paraparë 2 milionë euro.
Ndërtimi i SHFMU-së në Ferizaj (faza e dytë) – 3.7 milionë euro.
Ndërtimi i SHFMU-së në Fushë-Kosovë – 3.9 milionë euro.
Ndërtimi i shkollës fillore model në Pejë – 5.5 milionë euro.
Këto investime synojnë të përmirësojnë infrastrukturën arsimore dhe kushtet e mësimdhënies në këto komuna.
