Ministria e Punëve të Jashtme dhe Diasporës e Republikës së Kosovës ka mirëpritur vendimin e autoriteteve malazeze për heqjen e tabelës sinjalizuese në Murinë, e cila mbante mbishkrimin “Peć Srb” dhe përmbajtje të papranueshme, në kundërshtim me frymën e fqinjësisë së mirë dhe respektit ndërshtetëror.
MPJD kishte ndjekur me shqetësim këtë rast dhe, menjëherë pas marrjes së informacioneve, ka ndërmarrë veprimet e duhura përmes Ambasadës së Kosovës në Podgoricë, duke adresuar çështjen pranë institucioneve kompetente të Malit të Zi.
Pas këtij angazhimi institucional, tabela është hequr. Ministria e cilëson këtë veprim si një hap të rëndësishëm drejt ruajtjes së marrëdhënieve të mira fqinjësore, si dhe një akt respekti ndaj sovranitetit dhe integritetit territorial të Republikës së Kosovës.
MPJD gjithashtu ka falënderuar aktivistët dhe banorët e zonës për reagimin e tyre qytetar dhe kontributin në sensibilizimin e opinionit publik për mbrojtjen e vlerave demokratike.
