Instituti Hidrometeorologjik i Kosovës ka njoftuar se me hyrjen në stinën astronomike të verës, vendi po ndikohet nga masa ajrore relativisht të paqëndrueshme, të cilat gjatë fillimit të javës do të favorizojnë zhvillimin e vranësirave konvektive, reshjeve lokale të shiut dhe shkarkimeve rrufesh.
Sipas IHMK-së, këto reshje pritet të kenë ndikim pozitiv në sektorin e bujqësisë, pasi kontribuojnë në ruajtjen e lagështisë së tokës dhe përmirësimin e kushteve agrometeorologjike për kulturat bujqësore.
Instituti vlerëson se kushtet biometeorologjike do të jenë përgjithësisht të favorshme për pjesën më të madhe të popullatës, megjithëse gjatë intervaleve me temperatura më të larta dhe para zhvillimit të stuhive lokale mund të ketë shqetësime të lehta te personat e ndjeshëm ndaj ndryshimeve atmosferike.
Po ashtu, indeksi UV gjatë intervaleve me diell do të jetë i lartë, ndaj rekomandohet shmangia e ekspozimit të zgjatur në diell gjatë orëve të mesditës dhe përdorimi i masave mbrojtëse.
Për ditën e hënë, IHMK parashikon mot të vranët me intervale me diell. Gjatë ditës priten reshje lokale shiu dhe shkarkime rrufesh.
Temperaturat minimale do të lëvizin ndërmjet 13 dhe 16 gradë Celsius, ndërsa ato maksimale nga 26 deri në 29 gradë Celsius. Era do të fryjë nga veriperëndimi me shpejtësi prej 1 deri në 11 metra në sekondë.
Në qytetet kryesore të vendit, temperaturat maksimale do të arrijnë deri në 29 gradë Celsius në Prizren, Gjakovë dhe Istog, ndërsa në Prishtinë dhe Pejë do të shënohen deri në 28 gradë Celsius. Për të martën parashikohet rritje e lehtë e temperaturave, me vlera maksimale deri në 30 gradë Celsius në disa zona të Kosovës.
