Ministrja e Ekonomisë, Artane Rizvanolli sot ka raportuar para Komisionit për Ekonomi, Industri, Ndërmarrësi dhe Tregti lidhur me gjendjen e krijuar në ndërmarrjen “Trepça”.
Rizvanolli ka njoftuar se brenda kësaj jave do të shpallet konkursi për Kryeshef Ekzekutiv për Ndërmarrjen e Trepçës, pozitë kjo që ka funksionuar tash e dy vite me Ushtrues Detyre.
“Gjatë mbledhjes së jashtëzakonshme të pesë nëntorit, Bordi Mbikqyrës ka marrë vendim për shpalljen e konkursit për pozitën e Kryeshefit ekzekutivtë ndërmarrjes, duke qenë se kjo pozitë ka qenë duke funksionuar me Ushtrues Detyre me dy vite. Konkursi do të zhvillohet sipas ligjit, dhe me të gjitha masat e nevojshme për të siguruar një ecuri transperente, korrekte dhe përzgjedhje meritore”, ka thënë ajo.
Rizvanolli po ashtu ka komentuar edhe grevën e urisë nga minatorët e minierës, duke thënë se kjo greva nuk ka qenë e organizuar në përputhje me legjislacionin në fuqi në disa aspekte si “nuk ka pasur këshill grevist siç parashihet me ligj dhe se nuk ka pasur informata lidhur me organizatorët e grevës, numrin e saktë dhe gjendjen shëndetësore të tyre”.
“Greva nuk ka qenë e organizuar në përputhje me legjislacionin në fuqi në disa aspekte kyçe, duke përfshirë këtu që nuk ka pasur informata në lidhje me organizatorët e grevës, me numrin e saktë të grevistëve dhe gjendjen shëndetësore prej secilit prej tyre, kohën e hyrjes dhe daljes së grevistëve dhe personave të tjerë në minierë. Për bordin ka qenë pak situatë e vështirë pasi që nuk ka pasur një këshill grevist siç parashihet me ligj, I cili do të ishte i autorizuar për të përfaqësuar këndvështrimet dhe qëndrimet e punëtorëve”, ka theksuar Rizvanolli.
