Ministrja e Ekonomisë, Artane Rizvanolli, ka reaguar ashpër pas një emisioni televiziv që, sipas saj, kishte në shënjestër Shefen e saj të Kabinetit, Anyla Beqa. Në një postim të publikuar në rrjetet sociale, Rizvanolli e cilësoi emisionin si një “mizëri” të vërtetë që, në vend se të informojë qytetarët, përhap gjysmë të vërteta dhe dezinformata me qëllim të linçimit publik.
“Anyla Beqa, me përvojën dhe shkollimin që ka, mund të ishte duke punuar kudo, por ka zgjedhur t’i shërbejë shtetit të saj me përkushtim të plotë. Tash e katër vite, ajo ka dhënë një kontribut të çmuar, me profesionalizëm e integritet të lartë,” ka deklaruar ministrja.
Rizvanolli shprehu shqetësim për normalizimin e “pseudo-gazetarisë”, që sipas saj, nuk përfaqëson vlerat e gazetarisë së vërtetë si shtyllë e demokracisë, por përkundrazi, i gërryen ato. Ajo bëri thirrje për reflektim publik dhe përkrahje të profesionistëve të ndershëm.
“Refuzoj të besoj se në shoqërinë tonë është normalizuar propaganda, gjuha e urrejtjes dhe linçimi mbi baza të shpifjeve dhe dezinformatave. Zgjedhja është në duart tona si qytetarë – në çdo klikim, në çdo sekondë të kohës sonë,” theksoi ministrja.
