Pas publikimit të raporti të auditorit, i cili ka gjetur shumë shkelje, ka reaguar ministrja e Arsimit, e Shkencës, e Teknologjisë dhe Inovacionit, Arbërie Nagavci.
Nagavci, në një postim të saj në Facebook, ka theksuar se beteja për tekstet shkollore nuk do të ndalet dhe do të ndiqen të gjithë ata që kanë bërë dallavere me tekste dhe e kanë shndërruar botimin e teksteve shkollore në përfitim ilegal për grupe të ndryshme të interesit.
“Beteja me keqpërdorues në proces të përzgjedhjes dhe botimit të teksteve shkollore nuk do të ndalet. Hap pas hapi, deri në eliminimin e plotë të parregullsive dhe shpërdorimeve drejt qëllimit të përbashkët për tekste shkollore më cilësore.
Si përgjigje të shpejtë, kam kërkuar auditim të brendshëm mbi kriteret e përzgjedhjes së recensentëve, detyrat dhe përgjegjësitë e tyre, procedurat e vlerësimit të dorëshkrimeve dhe materialeve mësimore deri në procesin final të botimit të këtyre teksteve”, ka theksuar ministrja.
Ajo ka theksuar se gjetjet përbëjnë shqetësim për të, pasi janë gjetur shumë parregullsi, ligjore dhe profesionale, prandaj ato i ka dorëzuar te Njësia për Hetimin e Krimeve Ekonomike dhe Korrupsion në Policinë e Kosovës. Sipas saj, është përgjegjësi e organeve të drejtësisë të ndëshkojë keqpërdoruesit.
“Gjetjet e Auditorit janë shqetësuese! Vlerësimi i teksteve të reja shkollore, të hartuara dhe të botuara për vitet 2018-2019, është zhvilluar me shumë parregullsi ligjore, administrative e profesionale. Menjëherë, më 01 korrik 2022, këto gjetje i kam dorëzuar në Njësinë për Hetimin e Krimeve Ekonomike dhe Korrupsion të Policisë së Kosovës.
Shndërrimi i botimit të teksteve shkollore në mundësi përfitimi ilegal për grupe të ndryshme të interesit ka ndikuar negativisht në tërësi procesin dhe cilësinë e teksteve shkollore. I bëj thirrje Policisë dhe Prokurorisë që të trajtojnë me prioritet gjetjet e Auditorit.
Keqpërdorimet nuk mund të ngelin të pandëshkuara. Keqpërdorimet në arsim kanë ndikim të drejtpërdrejtë në të ardhmen e fëmijëve tanë.
Kjo është përgjegjësi e të gjithëve dhe në veçanti e organeve të drejtësisë.
E keqja duhet të ndalet!”, ka theksuar ministrja Nagavci/Kosovanews/
