Kryetari i LDK-së Lumir Abdixhiku në emisionin “Presing” në T7 javën e kaluar deklaroi se Ministria e Mbrojtjes ka dhënë tender sekret për ushqim të qenëve duke e akuzuar qeverinë e Kosovës se ka dhënë me qindra tender të tillë njëburimor.
Të njëjtën gjë e ka thënë edhe deputeti i LDK-së Anton Quni në kuvendin e Kosovës duke e akuzuar qeverinë për dhënien e kontratave sekrete me negocim.
“ Për ushqim të qejve, jo të ushtarëve, për ushqim të qejve kanë dhënë kontratë me negocim, për ushtarët e ushtrisë me garë tenderi nuk është sekret, po të kishte qenë sekret do të ishte ushqimi i ushtarëve por për ushqim të qejve kanë dhënë tender sekret me negocim të drejtpërdrejtë” ka thënë ndër të tjera Abdixhiku.
Kosovanews ka dërguar pyetje në Ministrinë e Mbrojtjes për të kërkuar sqarime se a janë të vërteta pretendimet e z.Abdixhiku se Ministria e Mbrojtjes e ka futur në kategorinë e tenderëve sekret ushqimin për qenë.
Në një përgjigje me shkrim nga Ministria e Mbrojtjes kanë thënë se tenderi për ushqim për qenë ka kaluar të gjitha procedurat e rregullta të tenderimit dhe nuk është tender njëburimor. Pra, ka qenë procedurë e hapur sipas Ligjit për Prokurim Publik.
“Ministria e Mbrojtjes deklaron se tenderi për K9 ka qenë i hapur në procedurë të rregullt, sipas planifikimit të prokurimit për vitin 2023. Ka kaluar të gjitha procedurat e rregullta të tenderimit dhe nuk është tender njëburimor. Pra, ka qenë procedurë e hapur sipas Ligjit për Prokurim Publik. Për të qenë të informuar plotësisht, mund të shihni në platformën e KRPP” thuhet në përgjigjien e Ministrisë së Mbrojtjes.
Ndërkohë KosovaNews në web faqen e KRPP-së ka gjetur të gjithë dokumentacionin e këtij tenderi aty shihet qartë se ka kaluar të gjitha procedurat në mënyrë të hapur por se për këtë tender kishte konkurruar vetëm një kompani.
Vlera e parashikuar e tenderit për ushqim për qenë ishte 65 mijë euro ndërsa u fitua nga një kompani me çmim prej prej 58 mijë e 250 euro.