Ministria e Kulturës, Rinisë dhe Sportit, ka organizuar të premten ceremoninë solemne të ndarjes së Çmimit Kombëtar për Vepër Jetësore “Azem Shkreli” dhe Çmimet Vjetore për Letërsi për vitin 2023.
Ministri i këtij dikasteri, Hajrullah Çeku gjatë takimit me jurinë përzgjedhëse përmendi veprat të cilat ishin në konkursin e çmimeve vjetore, derisa tha se kjo është vazhdimësi si vitet e mëparshme.
Juria që lexoi dhe mori vendimet për ndarjen e këtyre çmimeve për vitin 2023, ishte ne përbërje prej anëtarëve: Bardh Rugova – kryesues, Azem Deliu – anëtar, Vlora Ademi – anëtare, Alban Begiraj – anëtar dhe Naime Beqiraj – anëtare.
Bardh Rugova, kryesues i grupit të jurisë tha se aplikimet për këto çmime i kanë lexuar e vlerësuar dhe vendosën që çmimet të jepen si në vijim:
Çmimi Kombëtar Letrar për Vepër Jetësore “Azem Shkreli” iu nda Anton Nike Berishajt
Çmimi për veprën më të mirë në prozë “Anton Pashku” iu nda Afrim Demirit për veprën “Figura e 17-le”, përmbledhje me 40 tregime.
Çmimi për veprën më të mirë në poezi “Ali Podrimja”, e mori Halil Matoshi, për përmbledhjen e poezive “Lil’s poem”.
Çmimin për veprën më të mirë për fëmijë dhe të rinj “Vehbi Kikaj”, juria ka vendosur të mos jepet sivjet për shkak të siç u tha “prurjeve te varfëra”.
Çmimi për verën më te mirë në kritike letrare dhe eseistike “Ibrahim Rugova”, u nda për dy autorët, Kujtim Shala, për verën “Kënga e cjapit” dhe Nysret Krasniqi për verën “Ekuilibri letrar”.
Çmimi për veprën më të mirë të përkthyer në gjuhën shqipe “Pjetër Bogdani” e mori Blerte Ismajli për përkthimin e veprës se Jürgen Habermasit “Transformimi i ri i sferës publike dhe politika deliberative”.
