“Analfabetë akademikë” – Bislimi shpërthen ndaj LDK-së: Ne jemi legjitimë, ju jeni bllokues

Zëvendëskryeministri në detyrë i Kosovës, Besnik Bislimi, ka reaguar me tone të ashpra ndaj deklaratës së Lidhjes Demokratike të Kosovës (LDK), e cila më 10 qershor e vuri në pikëpyetje legjitimitetin e tij për të përfaqësuar Kosovën në takimet e dialogut me Serbinë në Bruksel.

Përmes një postimi në Facebook, Bislimi ka quajtur qëndrimin e LDK-së “shfaqje të hipokrizisë dhe injorancës”, duke theksuar se Kosova ka qeveri dhe ajo nuk është “ish-qeveri” siç e përshkruan opozita.

“Republika e Kosovës ka qeveri. Ajo nuk është ‘ish-qeveri’. Për institucionalistat e LDK-së, është e çuditshme se si ata duan që shteti të jetë pa institucione,” ka shkruar Bislimi.

Ai thekson se nuk është “kryenegociator i emëruar” nga Kryeministri Kurti, por mban pozitën legjitime të zëvendëskryeministrit të parë për Integrim Evropian, Zhvillim dhe Dialog — pozitë e përcaktuar me përgjegjësi kushtetuese, të cilën e ushtron edhe gjatë qeverisjes në detyrë.

Sipas tij, takimet në Bruksel nuk po prodhojnë obligime të reja për Kosovën, pasi tashmë ekziston Marrëveshja Bazike me Serbinë dhe ajo kërkon zbatim, jo negociim të ri.

“Nuk ka marrëveshje apo obligime të reja që rrjedhin nga Brukseli. Ato veçse janë ekzistuese dhe duhet të zbatohen,” theksoi ai.

Bislimi hodhi poshtë akuzat e LDK-së si “tentativë për manipulim” dhe “keqinformim të qytetarëve”, duke i quajtur përfaqësuesit e kësaj partie “analfabetë akademikë”.

Në reagimin e tij, ai kujtoi edhe periudhat problematike të qeverisjes së LDK-së, përfshirë vendimin e Gjykatës Kushtetuese që e shpalli të paligjshme një qeveri të drejtuar nga kjo parti në vitin 2021.

“LDK-ja është mirë që kur flitet për kompetenca, legjitimitet e zgjedhje të qeverive të shqyrtojë historinë e saj jo aq të largët,” shkroi Bislimi, duke shtuar se opozita as nuk po merr pjesë në votimin për formimin e institucioneve të reja pas zgjedhjeve të 9 shkurtit.

Reagimi i Bislimit erdhi pasi LDK kërkoi që dialogu me Serbinë të zhvillohet vetëm nga institucionet e reja, të dala nga zgjedhjet e fundit, duke kundërshtuar përfshirjen e qeverisë aktuale në këtë proces.

Postimi i Plotë i Bislimit: