Deputeti i Lidhjes Demokratike, Lufti Haziri ka insistuar se qeveria e unitetit që ka propozuar partia e tij mbetet zgjidhja që do ta nxirrte Kosovën nga bllokada.
Në një postim në Facebook, Haziri ka shkruar se duke parë gjendjen aktuale, politikanët duhet të sillen në mënyrë racionale drejt një opsioni me mundësi kalimtare.
Postimi i plotë:
Qeveria e pakicës përballë Qeverisë së Unitetit
Tash e disa muaj është folur për mundësi të qeverisjes së pakicës, më shumë si pritje e mundësi që ish-opozita të shkaktojë.
Nuk është shkaktuar asnjë veprim për të krijuar situatë të re politike. Asnjë veprim politik që ndërton besim se këto parti mund të arrijnë shumicën e thjeshtë për të krijuar mundësi qeverisjeje.
U faktua gjendja reale që nga 11 deputetë të pakicave jo serbe, shumica absolute i janë subordinuar me lojalitet VV-së, përmes Emilja Rexhepit e Elbert Krasniqit. Këta dy deputetë kanë shkuar aq larg sa që bashkëpunimin historik me LDK-në e kanë kthyer në lexim deklaratash si parti shoveniste. Kaq larg i ka çu VV-ja për interesa ditore!
Deputetët që dalin nga partitë politike shqiptare nuk kanë ofruar asnjë siguri për bashkangjitje këtij opsioni, si rasti me z. Limaj dhe marrëveshja e pazbatueshme me VV-në.
Ndërkaq, nëntë deputetë të Listës Serbe nuk janë pjesë e asnjë procesi politik prej 9 shkurtit.
Atëherë, në këtë gjendje faktike, duhet të sillemi në mënyrë racionale drejt një opsioni për një mundësi kalimtare, me agjende, formacion e qëllim të përbashkët.
Për nëntë muaj, do të shkaktoheshin procese të reja dhe hapen mundësi tjera. Përfundimisht, Qeveria e Unitetit është zgjidhja për ta nxjerrë vendin nga bllokada!
