Me kërkesë të Njësisë për Monitorimin e Ndërmarrjeve Publike të Ministrisë së Ekonomisë, sot është mbyllur kompania paralele e ujësjellësit “Ibar” në Mitrovicën e Veriut.
Lajmin e ka bërë të ditur ministrja e Ekonomisë, Artane Rizvanolli, e cila e cilësoi këtë si një hap të rëndësishëm drejt sundimit të ligjit dhe funksionalizimit të shërbimeve publike nga institucionet shtetërore.
“Ky është një hap konkret që i shërben sundimit të ligjit dhe funksionalizimit të shërbimeve publike nga institucionet e shtetit tonë,” ka deklaruar Rizvanolli.
Në përputhje me marrëveshjen e arritur në janar të këtij viti ndërmjet Kompanisë Rajonale të Ujësjellësit (KRU) Mitrovica dhe Komunës së Mitrovicës së Veriut, ofrimi i shërbimeve të ujësjellësit për qytetarët e kësaj komune do të bëhet nga KRU Mitrovica, me standarde më të larta dhe në përputhje me legjislacionin e Republikës së Kosovës.
Ministrja Rizvanolli falënderoi Policinë e Kosovës për mbështetjen në këtë proces, si dhe KRU Mitrovicën për angazhimin në ofrimin e shërbimeve për të gjithë qytetarët, pa dallim.
“Ky është shteti ynë, këto janë institucionet tona, dhe ato do të jenë të vetmet që shërbejnë në Republikën e Kosovës,” përfundoi ajo.
