Ministri i Punëve të Brendshme Xhelal Sveçla, ka thënë se grupi terrorist që sulmoi Policinë e Kosovës në Banjskë të Zveçanit, ka ardhur nga Serbia, teksa shton se të njëjtit janë të trajnuar në Serbi, dhe të financuar nga shteti serb .
Në një prononcim për median prestigjioze britanike “The Guardian”, ministri Sveçla ka thënë se një pjesë e armëve janë marrë nga magazinat e ushtrisë serbe.
“Ky grup ka ardhur nga Serbia, ata janë të trajnuar në Serbi, të financuar nga ata dhe gjithashtu të pajisur nga ushtria e Serbisë dhe policia e saj. Një pjesë e armëve janë marrë nga magazinat e ushtrisë dhe janë dorëzuar te terroristët që kanë ardhur në Kosovë nga Serbia”, ka thënë Sveçla.
Sveçla tha se ministria që ai udhëheqë ka ndarë provat me ambasadat dhe agjencitë perëndimore.
Po ashtu, sipas tij qëllimi përfundimtar ishte ndarja e vendit.
“Ajo që ata donin të bënin është të kapnin territorin e Kosovës dhe të hapnin një kanal të ri komunikimi, një rrugë të re nga Serbia në Kosovë”, tha ai.
Sulmi i armatosur në Banjskë të Zveçanit solli edhe më shumë forca speciale të Policisë së Kosovës në pjesën veriore të vendit.
Vetëm dy muaj e gjysmë më parë, Qeveria e Kosovës ishte pajtuar për të zvogëluar praninë e kësaj njësie në zonën e banuar me shumicë serbe.
Kjo ishte pjesë e një marrëveshjeje me Bashkimin Evropian për uljen e tensioneve.
Situata atje u acarua nga fundi i majit, kur kryetarët shqiptarë të komunave, nën përcjelljen e policisë speciale, u vendosën në objektet komunale.
Veprimi nxiti reagimin, herë-herë edhe të dhunshëm, të popullatës lokale, që kundërshton si kryetarët shqiptarë, ashtu edhe praninë e forcave speciale të Policisë së Kosovës.
Pas trysnisë disajavëshe të BE-së, Qeveria e Kosovës u dakordua ta zvogëlojë përgjysmë praninë e njësisë speciale përreth objekteve komunale në veri, si dhe të organizojë zgjedhje të reja atje.
Por, sulmi në Banjskë, ku grupe të armatosura qëlluan Policinë e Kosovës duke vrarë një pjesëtar të saj më 24 shtator, u dha kah tjetër zhvillimeve.
