Ministri i Bujqësisë, Pylltarisë dhe Zhvillimit Rural, Faton Peci ka reaguar ndaj deklaratës së ministrit të Mjedisit, Planifikimit Hapësinor dhe Infrastrukturës, Liburn Aliu, i cili ka ripërsëritur sot se Kosova është një projekt i përkohshëm, duke iu referuar aspiratës për bashkim me Shqipërinë.
Peci në një prononcim për media ka thënë se formimi dhe rrugëtimi i tij politik i takon konceptit që jo vetëm beson fuqishëm se Kosova është e përjetshme, por edhe përpiqet çdo ditë për jetësimin e kësaj platforme.
Sipas tij, kjo platformë është tepër e qartë: Republika e Kosovës shtet i pavarur e sovran, me identitetin e saj politik, i cili identitet është ndërtuar me mundin e brezave, me gjak, sakrificë e konsekuencë.
“Republika e Kosovës e ka tanimë të formësuar identitetin e vet shtetëror, të njohur ndërkombëtarisht dhe do të vazhdojë ta forcojë më tej atë bashkë me aleatët strategjikë.
Ky qëndrim, kjo bindje e ky gjakim për Kosovën e përjetshme është mishëruar thellë në konceptin politik të GUXO-s, të projektuar nga Presidentja e Republikës, Vjosa Osmani-Sadriu.
Andaj, Kosova është e përjetshme”, ka thënë për Telegrafin, Peci.
Ndryshe, ministri i Mjedisit, Planifikimit Hapësinor dhe Infrastrukturës, Liburn Aliu, të enjten në një emision televiziv ka thënë se Kosova është një projekt i përkohshëm, duke iu referuar aspiratës për bashkim me Shqipërinë.
Ai ka thënë se nuk mund të krijohet një komb kosovar, apo se premisat janë që kjo mos të ndodh, ndërsa ka theksuar se kjo do të nënkuptonte një përzierje të etnive, që sipas tij nuk po ka sukses.
Ministri Aliu mes tjerash kishte thënë se “Kosova është projekt i përkohshëm” dhe se synimet e shqiptarëve janë që të heqin kufijtë mes trojeve të veta.
