Ministri i Mjedisit, Planifikimit Hapësinor dhe Infrastrukturës, Liburn Aliu, ka raportuar në Komisionin për Mjedis, Ushqim, Bujqësi, Planifikim dhe Zhvillim. Aliu në Komision ka thënë se intervenimi te vila e Milan Radojiçiqit, i dyshuari kryesor për sulmin në veri, do të shoqërohet me lirimin e by-passit që u blloku nga vërshimet.
“Ajo është në by-pass të tuneli kjo është një projekt tjetër. Kur ka ndodhur vërshimi në veri tuneli i parë ka pasur shembje dhe ka qenë i bllokuar komplet tuneli dhe by-passi ka qenë i zaptuar. Intervenimi te vila e Radojiçiqit duhet të shoqërohet me lirimin e by-passit, dhe po ashtu të gjitha by-passeve që janë të zënë për arsye siguri më fushë e trafikut”, ka theksuar ai.
Ministri Aliu tha se Ministria ka vazhduar punën në projektet që kanë qenë në punë dhe ka nisur disa projekte të reja. Sipas tij, prioritet kryesor i kësaj ministrie ka qenë çështja e mjedisit. Ai ka thënë se në këtë fushë është punuar më disa projekte dhe udhëzime administrative që do të ketë ndikim në ndryshimet klimatike.
Ministri ka thënë se problem në vend është mungesa e resurseve ujore dhe se vendi për këtë çështje do të preket shumë edhe nga ndryshimet klimatike. Sipas tij, ministria është duke bërë studimet të fisibilitetit dhe ndërtim të digave të cila do të ndikojnë në furnizim me ujë të pijes. Gjithashtu ai ka theksuar se ndërtimi i tyre do të ketë ndikim edhe në menaxhimin e vërshimeve.
“Vendi ynë ka jashtëzakonisht pak resurse ujore, kemi pak potencial edhe për prodhim të energjisë dhe pijes, e lerë me për ujitje. Këto projekt që kanë të bëjnë me rezervat do të jenë një resurs ujor që do të plotësoj kërkesat e kësaj ane për ujë të pijes. Kjo i menaxhon edhe vërshimet, Kosova në rajon është vendi me i ndjeshëm më furnizim më ujë dhe ne do të prekemi me ndryshimet klimatike jashtëzakonisht shumë. I kanë munguar vendit tone studimet e fizibilitetit, këto rezervate do të ndikojnë edhe thatësira”, ka thënë ai.
Ministri Aliu i është përgjigjur deputetëve edhe për tjera.
