Ministria e Kulturës, Rinisë dhe Sportit e ka organizuar panelin diskutues të ministrave “Ekonomia kreative në perspektivë”. Në këtë panel është thënë se ekonomia kreative, si koncept relativisht i ri në tregjet globale, gradualisht po transformohet në një ndër ekonomitë me rritjen më të shpejtë dhe ndikimin më të madh në zhvillimin e gjithëmbarshëm të qendrave botërore të kulturës.
Në panel ështëe thënë se ekonomia kreative në fokus ka krijimin e vendeve të punës dhe rritjen ekonomike përmes rrjetëzimit të industrive që kontribuojnë drejtpërdrejt në të.
Sipas ministrave të linjës, Qeveria e Kosovës po fillon hartimin e strategjisë të ekonomisë kreative me qëllim të përafrimit të orientimeve strategjike të vendit me politikat e Bashkimit Evropian dhe trendet zhvillimore në nivel ndërkombëtar.
Ministrja e Industrisë, Ndërmarrësisë dhe Tregtisë, Rozeta Hajdari, ka theksuar se ekonomia kreative kontribuon në rritjen ekonomike por edhe në promovimin e imazhit të Kosovës në arenën ndërkombëtare.
“Vlen të përmendet së pari, dizajni, arkitektura, media digjitale dhe më shumë, por edhe dizajnin grafik, pastaj ky sektor i ekonomisë kreative kontribuon në rritjen ekonomike por edhe në promovimin e imazhit të Kosovës në arenën ndërkombëtare. Çka mund të përmendi te industria që është iniciativa për dizajn, që është dizajni grafik, dizajnin e produkteve inovative që ndërthurin estetiken tradicionale dhe bashkëkohore që është një potencial i madh i kreativitetit në ekonominë tonë”, ka theksuar Hajdari.
Ministri i Kulturës, Hajrullah Çeku, ka thënë se ky proces mundëson formësimin e vizionit të përbashkët të mozaikut të larmishëm të akterëve kyç për ekonominë kreative dhe dizajnimin e veprimeve për transformimin e Kosovës në qendër rajonale të inovacionit në prodhimin kulturor.
“Potencialin e ekonomisë kreative e shoh në dy rrafshe: i pari ka të bëjë me rezultatet që vijnë për shumë vite nga arena ndërkombëtare për artistët dhe organizatën kulturore dhe institucionet kulturore të Kosovës. Para pak kohësh kishim çmimin e parë në Zamora të Spanjës nga Ansambli Shota e shumë çmime tjera të institucioneve dhe artistëve. Pra, kemi cilësi dhe tashmë nuk janë vetëm suksese vendore por edhe ndërkombëtare të dëshmuara për disa vite radhazi, dhe e dyta ka të bëjë me aspektin ekonomik. Studimi për ndikimin socio-ekonomik të Manifestës, e ka dëshmuar këtë raportin e investimit në kulturë që është 1 me 4”, ka deklaruar Çeku.
Ndërsa, ministrja e Arsimit, Arbërie Nagavci, tka theksuar se procesi i hartimit të strategjisë ofron platformë të ndërveprimit të institucioneve qendrore, institucioneve lokale, pionierëve dhe ekspertëve të fushës nga Evropa dhe Britania e Madhe, shoqërisë civile, krijuesve kreativë dhe kontribuuesve të tjerë relevantë.
