Në situatën e rritjes së çmimeve, një mërgimtar ka zgjedhur të mendojë për personat të cilët nuk kanë mundësi ekonomike ta sigurojnë miellin.
Një akt i tillë humanitar vjen nga një fermer nga Gjakova i cili tash e 32 vjet jeton në ShBA dhe arën të cilën e ka mbjellë me grurë, ka vendosur ta japë për personat në nevojë.
Kolë Syla nga Vogova e Gjakovës ka mbjellur sipërfaqe me grurë në vendlindjen e tij. Ndërkaq, miellin e dy hektarëve të cilin do ta nxjerrë nga të korrat e sivjetme, ka vendosur ta dhurojë për njerëzit në nevojë.
“Siç po shihet edhe për këtë vit rendimenti duke e llogaritur edhe plehun e bagëtive dhe atë artificial e ka pas efektin e vet. Kam marr fryt prej kësaj toke gjashtë mijë kilogramë grurë. Prej këtij fryti unë nuk e kam marr asnjë kilogram .Ju kam dhurua njerëzve që kanë pas nevojë”, ka thënë për rtk, Syla.
Kjo nuk është hera e parë që ai e bën një gjë të tillë. Përveç kësaj ai kontribuoi edhe ndërtimin e urës së re, hapjen dhe pastrimin e rrugës kryesore që lidhë Vogovën me fshatrat tjera, hapja e rrugëve fushore, rregullimi i rrjetit elektrik.
