Një Memorandum i Bashkëpunimit është nënshkruar sot ndërmjet Ministrisë së Kulturës Rinisë dhe Sportit dhe Federatës së Xhudos, që ka për qëllim trajnimin e ushtarakëve të Forcës së Sigurisë së Kosovës (FSK).
Ministri i Mbrojtjes, Armend Mehaj bëri të ditur se me nënshkrimin e sotëm po i jepet jetë konceptit të integrimit të arteve marciale në programet e përhershme trajnuese dhe arsimore në Forcën e Sigurisë së Kosovës
“Ky koncept që është në linjë me programin ‘’Kosova, shtet i xhudos’’ do të filloj së zbatuari gjatë këtij viti si pjesë e trajnimeve formale të nivelit bazik
Ky Memorandum ka për qëllim ngritjen e kapaciteteve profesionale të FSK-së, ashtu që në kuadër të investimit në arsimimin dhe trajnimin e ushtarëve në fushën operacionale, përmes angazhimit të xhudistëve tashmë të mirënjohur ndërkombëtarisht, të aftësojnë ushtarakët tanë edhe në aplikimin e arteve marciale, si metodë për vetëmbrojtje, neutralizim të kundërshtarit, por dhe nxitje të shpirtit garues ndërmjet ushtarëve, pasi programi është ambicioz, me synimin që Forca e Sigurisë së Kosovës të marr pjesë në garat botërore multidisiplinare të Këshillit Ndërkombëtar të Sporteve Ushtarake”, shkroi Mehaj.
Përmes këtij programi, sipas ministrit Mehaj përveç investimit në përgatitjen e oficerëve dhe ushtarëve, do të vlerësohet edhe profesionalizmi i xhudistëve tanë duke i angazhuar në institucionet tona të sigurisë.
