Gjilani ka shënuar 15 Qershorin, Ditën e Çlirimit, përmes një sërë aktivitetesh kulturore, sportive dhe përkujtimore që u zhvilluan gjatë gjithë ditës.
Pjesa e parë e agjendës u hap me gjysmë-maratonën “Gjilani Half Marathon – edicioni i 4-të”, që sipas kryetarit Hyseni, simbolizon përkushtimin qytetar ndaj lirisë dhe kujtesën kolektive për ata që sakrifikuan për të.
Menjëherë pas saj, përfaqësues komunalë dhe qytetarë kryen homazhe pranë Kompleksit të Varrezave të Dëshmorëve, duke u përulur para kujtimit të atyre që dhanë jetën për liri.
Në vijim, në sallën e Kuvendit Komunal, u mbajt seanca solemne për nder të kësaj dite, ku u nderuan figura që kanë dhënë kontribut të çmuar ndër vite.
Me mirënjohje të veçanta u nderuan Sabit Uka (pas vdekjes) për sakrificën për liri, Dr. Arben Bislimi për përkushtimin në shëndetësi, Aqif Uka dhe Gani Shaqiri për kontributin në rrugën drejt çlirimit, si dhe Rexhep Elmazi (pas vdekjes) për gjurmët që ka lënë në historinë kombëtare.
Aktivitetet përkujtimore vazhduan edhe në fshatin Livoç i Epërm, ku u bë zbulimi i lapidarit për dëshmorët Mehmetali dhe Shyqeri Ajvazi. Në këtë ceremoni, përveç familjarëve, mori pjesë edhe Ahmet Isufi, ish-komandant i Zonës Operative të Karadakut.
Në fund të ditës, vëmendja u zhvendos te fusha e sportit, ku veteranët dhe legjendat e klubeve futbollistike të qytetit, SC Gjilani dhe FC Drita, zhvilluan një ndeshje miqësore për të nderuar këtë datë historike. Në këtë ngjarje sportive mori pjesë edhe ekipi i veteranëve të KF Kumanova, duke shprehur përmes sportit frymën e bashkëpunimit përtej kufijve.
