Gjykata Themelore në Gjilan, dega në Viti, e ka dënuar me 500 euro gjobë të akuzuarin se në shtëpinë e tij gjatë bastisjes, policia kanë gjetur dhe sekuestruar duhan, të grirë me peshë rreth 51.9 kg, të cilin duhan e kishte mbjellë në pronën e tij, me qëllim për ta shitur në treg.
Shpalljen e aktgjykimit e ka bërë të enjten, gjykatësi Nexhat Aliu, raporton “Betimi për Drejtësi”.
Sipas gjykatësit Aliu, i akuzuari obligohet të paguaj edhe shpenzimet e procedurës, dhe atë në shumë prej 30 euro.
Deri tek ky dënim ka ardhur pasi i pandehuri në seancën e shqyrtimit fillestar ka pranuar fajësinë për veprën penale për të cilën ngarkohej.
Prokuroria Themelore në Gjilan, më 2 shkurt 2021, ka ngritur aktakuzë ndaj S.R., me arsyetimin se ai më 12 dhjetor 2020, rreth orës 19:40, në fshatin Drobesh, Komuna e Vitisë, Policia e Kosovës, përkatësisht njësiti i SQHN-DHIN, kanë bërë bastisjen në pronën – shtëpinë e të pandehurit dhe gjatë bastisjes, policia kanë gjetur dhe sekuestruar duhan – refuz, i grirë me peshë rreth 51.9. kg, të cilin duhan e kishte mbjellë në pronën e tij, me qëllim për ta shitur në treg, e që sipas vlerësimit të doganës, vlera e mallit është 190 euro e 99 cent.
Me këtë, S.R. akuzohet se ka kryer veprën penale “Tregti e ndaluar”, nga neni 299 paragrafi 2 të KPRK-së.
