Kryesia e Kuvendit të Republikës së Kosovës do të mblidhet të premten me fillim nga ora 13:00.
Siç thuhet në faqen zyrtare të Kuvendit, në rend dite përfshihen pika të mbetura nga seancat e kaluara të Kuvendit. Njëherit, në rend dite hynë edhe propozimi i rendit të ditës për seancën plenare të radhës.
Bazuar në njoftim, bëhet fjalë për pikat e papërfunduara nga seanca plenare e mbajtur më 8 dhe 15 qershor, pika e papërfunduar nga seanca plenare e mbajtur më 6, 7 prill dhe 7 qershor, pikat e papërfunduara nga seanca plenare e mbajtur 20 prill, pika e papërfunduar nga Seanca e Jashtëzakonshme e mbajtur më 26 prill dhe pikat e papërfunduara nga seanca e 4 majit.
Ndërkaq, lidhur me propozimin e rendit të ditës për seancën plenare të re hyjnë deklarimet jashtë rendit të ditës, pyetjet parlamentare, votimi në parim i Projektligjit për shëndet riprodhues dhe fertilizim të asistuar mjekësor, Interpelanca me ministrin e Ministrisë së Financave, Punës dhe Transfereve, Hekuran Murati për çështjen: “Rishikimi i buxhetit të Republikës së Kosovës dhe rritja e pagave në sektorin publik”, Interpelanca me Kryeministrin e Republikës së Kosovës,Albin Kurti në lidhje me çështjen: ”Përgjegjësia e tij në raport me ambasadorin e Republikës së Kosovës në Kroaci, z. Martin Berishaj”.
‘VII. Propozimi i rendit të ditës për Seancën plenare të re:
- Miratimi i procesverbaleve nga seancat e mëparshme,
- Deklarimet jashtë rendit të ditës,
- 3.Pyetjet parlamentare,
- Votimi në parim i Projektligjit nr.08/L-212 për shëndet riprodhues dhe fertilizim të asistuar mjekësor,
- Interpelanca me ministrin e Ministrisë së Financave, Punës dhe Transfereve, z. Hekuran Murati për çështjen: “Rishikimi i buxhetit të Republikës së Kosovës dhe rritja e pagave në sektorin publik”,
- Interpelanca me Kryeministrin e Republikës së Kosovës, z. Albin Kurti në lidhje me çështjen: ”Përgjegjësia e tij në raport me ambasadorin e Republikës së Kosovës në Kroaci, z. Martin Berishaj”,
- Shqyrtimi i Projektligjit nr.08/L-234 për ratifikimin e Marrëveshjes së kredisë për programin e financave publike dhe rritjes ekonomike ndërmjet Republikës së Kosovës dhe Fondit OPEC për Zhvillim Ndërkombëtar,
- Shqyrtimi i dytë i Projektligjit nr.08/L-102 për ndryshimin dhe plotësimin e Ligjit nr.04/L-139 për procedurën përmbarimore i ndryshuar dhe plotësuar me ligjin nr. 05/L-118,
- Shqyrtimi i dytë i Projektligjit nr.08/L-199 për ndryshimin dhe plotësimin e Ligjit nr.05/L-060 për Mjekësinë Ligjore,
- Emërimi i kryesuesit dhe i një (1) anëtari të Bordit të Agjencisë Kosovare të Privatizimit”, thuhet në njoftim.
Në seancën plenare të Kuvendit të Kosovës të mbajtur të enjten, Kryeministri Albin Kurti, me kërkesë të opozitës, morri pjesë për të raportuar lidhur me kidnapimin e tre policëve në veri të vendit nga forcat policore serbe.
Kurti ka kërkuar përgjegjësi ndaj KFOR-it, në lidhje me kidnapimin e tre zyrtarëve policorë nga xhandarmëria e Serbisë.
Ai ka thënë se KFOR-i nuk duhet të heshtë ndaj hyrjes në territor të Kosovës, nga ushtria speciale e Serbisë, veprim i cili sipas tij është shkelje e marrëveshjes së Kumanovës.
Tre zyrtarë të Policisë së Kosovës janë kidnapuar në zonën kufitare në veri të Kosovës, ka njoftuar Policia e Kosovës, më 14 qershor.
Shtetet e Bashkuara të Amerikës kërkuan të enjten lirimin pa kushte të tre pjesëtarëve të policisë së Kosovës të kidnapuar nga forcat serbe. Ky qëndrim u shpreh nga zëdhënësi i Departamentit të Shtetit, Matthew Miller në konferencën e përditshme për shtyp.
