Kryetarja e Gjykatës Themelore në Prishtinë, Albina Shabani-Rama, ka thënë se thënë se janë mbi 66 mijë lëndë të pazgjidhura në gjykatën që e udhëheq.
Ajo ka thënë se numri më i madh i lëndëve të pazgjidhura, ose mbi 36 mijë, janë nga departamenti civil.
“Sa lëndë kanë mbetur deri më 1 prill 2023, Gjykata Themelore e Prishtinës, pa degë, do të thotë janë mbi 66 mijë lëndë që presin zgjidhje. Prej tyre, 11 e 397 penale të përgjithshme, 110 në Departamentin Special, 1586 në krime të rënda, 553 lëndë në Departament për të Mitur, 36 mijë e 664 dosje në lëmine civile, 7 mijë e 301 dosje në procedurën administrative dhe 6 mijë 720 lëndë në kundërvajtje”, ka thënë Shabani-Rama.
Ajo ka thënë se Gjykata Themelore e Prishtinës po përballet me mungesë të gjyqtarëve dhe numër të madh të lëndëve të pranuara, raporton betimi për drejtësi.
“Mbetet sfidë numri i madh i lëndëve dhe numri i vogël i gjyqtarëve”, ka thënë ajo.
Shabani-Rama ka thënë se efikasiteti në Gjykatën Themelore në Prishtinë është mbi 73 për qind sipas standardeve ndërkombëtare. “Është rritur efikasiteti i gjykatës”, ka thënë ajo.
Shabani-Rama ka thënë se gjatë tremujorit të parë kanë publikuar edhe 785 aktgjykime.
Këto të dhëna, Shabani-Rama i ka paraqitur të premten, në prezantimin e raportit tremujor të punës së Gjykatës Themelore në Prishtinë. Ky prezantim i raportit është organizuar nga Qendra për Ndihmë Juridike dhe Zhvillim Regjional (CLARD) dhe Instituti i Kosovës për Drejtësi (IKD), në bashkëpunim me Kryetaren e Gjykatës Themelore të Prishtinës Albina Shabani-Rama.
Ky aktivitet implementohet nga organizata CLARD në bashkëpunim me IKD-në dhe në mbështetje të Ambasadës Amerikane në Prishtinë Departamentit të Shtetit Amerikan Byrosë së Narkotikëve Ndërkombëtar dhe Çështjeve të Zbatimit të Ligjit INL.
