Mbi 140 dronë ukrainas gjatë natës shënjestruan rajone të shumta ruse, duke përfshirë kryeqytetin Moskë dhe zonat përreth, raportuan zyrtarët rusë të martën, në një nga sulmet më të mëdha me dron ukrainas në tokën ruse.
Në qytetin Ramenskoye pak jashtë Moskës, dronët goditën dy ndërtesa banimi shumëkatëshe dhe ndezën zjarre, tha guvernatori i rajonit të Moskës, Andrei Vorobyov. Një grua humbi jetën dhe tre persona të tjerë u plagosën. Pesë ndërtesa banimi pranë njërës prej atyre të dëmtuara janë evakuuar pasi shërbimet e urgjencës po trajtonin mbeturinat e dronëve, tha Vorobyov, njofton AP.
Sulmi bëri që autoritetet të mbyllnin përkohësisht tre aeroporte jashtë Moskës – Vnukovo, Domodedovo dhe Zhukovsky. Një total prej 48 fluturimesh u devijuan në aeroporte të tjera, sipas autoritetit rus të aviacionit civil Rosaviatsia.
Në Moskë, mbeturinat e dronëve ranë në një shtëpi private në periferi të qytetit, por askush nuk u lëndua, tha kryebashkiaku Sergei Sobyanin. Ai numëroi mbi një duzinë dronë që shkonin drejt Moskës, të cilët u rrëzuan nga mbrojtja ajrore ndërsa po i afroheshin qytetit.
Në përgjithësi, Ministria e Mbrojtjes e Rusisë tha se “ka përgjuar dhe shkatërruar” 144 drone ukrainas mbi nëntë rajone ruse, duke përfshirë ato në kufirin me Ukrainën dhe ato më thellë brenda Rusisë.
Ky është sulmi i dytë masiv me dron ukrainas në Rusi këtë muaj. Më 1 shtator, ushtria ruse tha se ka kapur 158 dronë ukrainas mbi një duzinë rajone ruse në atë që media ruse e përshkruan si breshëria më e madhe e dronëve ukrainase që nga fillimi i luftës.
