Ministri i Mbrojtjes, Ejup Maqedonci, ka thënë se sulmet nga Serbia në Kosovë, sidomos në pjesën e veriut të vendit, mund të jenë të mundshme përderisa Milan Radoiçiq dhe grupi i tij janë në liri.
I pyetur për paralajmërimin e kryeministrit Kurti se mund të ketë sulme në veri para ose pas Viti të Ri, ai ka thënë se kjo është paralajmëruar gjatë gjithë kohës, por që Kurti ka qenë më specifik.
Maqedonci ka thënë se grupi i Radoiçiqit vazhdo të përkrahet nga strukturat e sigurisë së Serbisë dhe kryen aktivitete në këtë shtet.
“Sulmet mund të jenë të mundshme për faktin që grupi i Radoiçiq vazhdon të jetë i lirë, për më tepër vazhdon të mbështetet nga strukturat e sigurisë në Serbi dhe vazhdon të mbetet edhe i organizuar”, tha ai në Teve1.
Maqedonci ka thënë se me paralajmërimet për sulme nuk po dëshirojnë të ngjallin panik tek qytetarët, por siç është shprehur ai e kanë për detyrë t’i njoftojnë qytetarët me rreziqet dhe kërcënimet që i vijnë vendit.
Vetëm gjatë vitit 2024 në veri të vendit janë kryere 15 sulme, që kanë pas cak edhe objekte institucionale. I fundit ishte ai më 29 nëntor në kanalin “Ibër – Lepencit”.
