Mal me shkelje ligjore ka gjetur Inspektorati i Punës, së Ministrisë së Financave, Punës e Transfereve, në grevat e organizuara nga Bashkimi i Sindikatave të Pavarura të Kosovës (BSPK), që kishin nisur me 25 gusht dhe tanimë është shtrirë në të gjitha nivelet e shkollave dhe administratat komunale, raporton KosovaNews.
Në raportin e Inspektoratit të Punës të siguruar nga KosovaNews, thuhet se BSPK-ja nuk ka informuar punëdhënësit e drejtpërdrejtë të të punësuarve për mbajtjen e grevës, gjë që bënë shkelje te nenit 8 të Ligjit për Grevat.
Po ashtu bëhet e ditur se nisjen e grevave, BSPK-ja e ka bërë vetëm me një njoftim të dërguar në adresë të zyrtares së dialogut të Ministrisë së Financave.
Raporti i përgatitur nga inspektorët, thotë se sindikalistët gjithashtu nuk e kanë marrë për bazë faktin se punëdhënës i drejtpërdrejtë për arsimin e sektorët tjerë janë Komunat.
Andaj sipas inspektorëve, njoftimi i mbajtjes së grevave, do të duhej t’i dërgohej Komunave, por që BSPK-ja ka shpërfillë këtë dispozitë.
Një tjetër shkelje e gjetur nga inspektorët e punës, është se BSPK-ja nuk ka dhënë dëshmi se ka marrë veprimet e nevojshme që shërbimet e rëndësisë jetike do të ofrohen për qytetarët edhe gjatë kohës së grevës, gjë që është obligim ligjor në dispozitën e 17 të Ligjit për Grevat.
Po ashtu, në raport thuhet se inspektorët nuk kanë autorizim të bëjnë interpretimin e ligjeve në të gjitha rastet kur dispozitat janë në kundërshtim me njëra-tjetrën dhe kur shkaktojnë paqartësi siç është rasti i dispozitës së nenit 18 e 13, që ndërlidhet me efektet e grevës së ligjshme.
Ndërkaq, konstatimi përfundimtar i inspektimit të grevës është se nuk është zbatuar neni 8 i Ligjit për Greva, pasi BSPK-ja nuk njoftuar të gjithë punëdhënësit, siç e obligon kjo dispozitë.
Po ashtu në raport thuhet se bazuar në dispozitën e nenit 8 paragrafi 1 i këtij neni, njoftimin për greva duhet ta bëjë Këshilli Grevist e jo siç ka vepruar BSPK-ja, ku e ka nënshkruar kryetari e ai i këshillit drejtues, sepse grevistët i përfaqëson vetëm Këshilli i Grevistëve.
Kujtojmë se gjatë ditës së djeshme, përmes një komunikate për media, BSPK-ja, deklaruar se, “Greva e përgjithshme është duke u zhvilluar plotësisht sipas rregullave dhe normave ligjore”.
Më poshtë mund të gjeni raportin e plotë të Inspektoratit të Punës:
Lexo po ashtu:
