Lista Serbe ka njoftuar se do të marrë pjesë në zgjedhjet parlamentare të 9 shkurtit 2025 në Kosovë.
Ndër arsyet që ka dhënë për këtë vendim është edhe ngjarja e së enjtes në Kuvendin e Kosovës, kur deputetë të Lëvizjes Vetëvendosje tentuan t’i pengonin ata të Listës Serbe të futeshin brenda sallës së seancave.
Në njoftimin e saj, LS ka thënë se “do t’i fitojmë që të gjitha dhjetë mandatet e destinuara për popullin serb dhe do ta ruajmë unitetin dhe harmoninë e popullit serb në këtë zonë”.
“Populli serb do të tregojë në zgjedhje për kë beson dhe kë dëshiron si përfaqësues të tij”, thuhet në njoftim.
Ajo është ankuar edhe për “heshtjen” që pretendon se bashkësia ndërkombëtare po ia bën pas ngjarjes në Kuvend.
“Përfaqësuesit e Listës Serbe janë të vetmit që përfaqësojnë interesat e popullit serb në Kosovë dhe pikërisht për këtë arsye ne jemi një halë në sy për regjimin e [kryeministrin e Kosovës] Albin Kurti, por edhe për përfaqësuesit ndërkombëtarë”, ka thënë Lista Serbe.
Lista Serbe ka bojkotuar seanca parlamentare prej nëntorit të vitit 2022. Deputetët e saj paraqiten në Kuvendin e Kosovës një herë në gjashtë muaj vetëm për të ruajtur mandatin dhe për të siguruar marrjen e pagave.
Të enjten, 5 dhjetor, ata u penguan të hynin në sallë ndërsa kryeparlamentari Glauk Konjufca i akuzoi për keqpërdorim të parasë publike dhe i kritikoi se nuk janë distancuar asnjëherë prej sulmeve në veri.
Kryetari i LS-së, Zllatan Ellek, pati thënë më herë se pret që partia e tij të merrte pjesë në zgjedhje, por nuk ka pasur konfirmim zyrtar deri tash.
