Një ngjarje tragjike është shënuar të dielën në komunën e Pejës, ku një punëtor ka humbur jetën gjatë orarit të punës.
Rreth orës 14:00, në Spitalin Rajonal të Pejës është dërguar një person pa shenja jete. Stafi mjekësor ka njoftuar menjëherë policinë, e cila ka dalë në spital për të ndërmarrë veprimet e nevojshme.
Viktima është identifikuar si Sylë Ramadani, 50-vjeçar nga fshati Burojë i Skenderajt, i punësuar në një kompani ndërtimi në fshatin Gorozhdevc. Dyshohet se ai është goditur nga rryma elektrike pranë një agregati, ndërsa ishte në vendin e punës.
Pavarësisht transportimit të menjëhershëm në spital, ai ka arritur pa shenja jete.
Në vendin e ngjarjes kanë dalë hetuesit rajonalë dhe njësitë policore, ndërsa Prokurori i Shtetit ka urdhëruar që trupi i pajetë të dërgohet në Institutin e Mjekësisë Ligjore në Prishtinë për obduksion.
Hetimet rreth rastit janë duke vazhduar.
