Ministrja Mimoza Kusari-Lila ka zhvilluar një takim me drejtoreshën ekzekutive të Agjencisë për Barazi Gjinore, Edi Gusia, dhe udhëheqësen e Zyrës së UN Women në Kosova, Vlora Tuzi Nushi, ku është diskutuar për sfidat dhe mundësitë për fuqizimin ekonomik të grave dhe vajzave.
Pas takimit, Kusari-Lila theksoi se fuqizimi i grave është thelbësor për zhvillimin e qëndrueshëm të vendit.
“Fuqizimi i grave nuk është vetëm një parim politikash, është fakt se zhvillimi i vërtetë i një vendi matet edhe me mundësitë që u krijohen grave dhe vajzave për të ndërtuar rrugën e tyre”, ka deklaruar ministrja Kusari-Lila.
Sipas saj, gjatë takimit është diskutuar hapur për sfidat me të cilat përballen gratë në rrugën drejt zhvillimit dhe fuqizimit ekonomik, por edhe për mundësitë konkrete për projekte të përbashkëta.
Ajo ka theksuar se barazia gjinore duhet të jetë pjesë përbërëse e çdo plani zhvillimor.
“Barazia gjinore duhet të jetë pjesë e çdo plani zhvillimor. Politikat ekonomike, industriale dhe mjedisore janë më të forta kur në qendër të tyre është edhe barazia e mundësive”, ka thënë Kusari-Lila.
Ministrja bëri të ditur se gjatë takimit është rënë dakord që të punohet për projekte konkrete që lidhen edhe me Bashkimi Evropian, përfshirë iniciativat në kuadër të Planit të Rritjes.
“U pajtuam që të punojmë së bashku për projekte konkrete, përfshirë edhe ato që lidhen me Planin e Rritjes së Bashkimit Evropian, në mënyrë që çdo iniciativë zhvillimore të ketë komponentë të qartë për ngritjen dhe fuqizimin ekonomik të grave dhe vajzave”, ka shtuar ajo.
Në fund, Kusari-Lila theksoi se fuqizimi i grave ndikon drejtpërdrejt në zhvillimin e përgjithshëm të vendit.
“Sepse kur gratë fuqizohen, rritet jo vetëm barazia, rritet edhe ekonomia, inovacioni dhe e ardhmja e vendit tonë”, ka përfunduar ajo.
