Kryeministri i Kosovës, Albin Kurti, ka falënderuar aletatët ndërkombëtare për, siç e quajti ai, modernizimin dhe trajnimin e Forcës së Sigurisë së Kosovës në ditën kur u bë rekrutimi i 311 ushtarëve të rinj në FSK.
Ai ka deklaruar në ‘Facebook’ se ushtria është detyrë dhe projekt madhor i qeverisjes së tij.
“Ushtria jonë po forcohet e zhvillohet për të siguruar e ruajtur paqen, demokracinë dhe progresin. U jemi mirënjohës partnerëve, vendeve mike e aleate për gjithë përkrahjen në modernizimin dhe trajnimin e FSK-së”, deklaroi ai.
“Ndërsa dje, me shumicë votash Kuvendi miratoi tri projektligje që fuqizojnë bazën ligjore për organizimin dhe funksionimin e Ministrisë së Mbrojtjes, FSK-së dhe të drejtat e obligimet për pjesëtarët e FSK-së: plotësim-ndryshimin e Ligjit për Shërbim në Forcën e Sigurisë së Kosovës, për Forcën e Sigurisë së Kosovës dhe për Ministrinë e Mbrojtjes”, shtoi ndër të tjera ai.
