Deputeti i Partisë Demokratike të Kosovës, Artan Behrami, ka reaguar ashpër ndaj deklaratave të deputetit të Lëvizjes Vetëvendosje, Sali Zyba, i cili pretendoi se PDK i kishte blerë tortë deputetit të Listës Serbe, Slavko Simiq, për ditëlindje.
Përmes një postimi në rrjetin social Facebook, Behrami i ka cilësuar këto pretendime si shpifje dhe ka paralajmëruar veprime ligjore kundër Zybës.
“Sa herë që Kurti e humb betejën me popullin, përmes Dejonës, e ndërsyn tipin e Zybës, të cilin e ka bërë deputet me qykë të zorit për ta mbajtur grupin e tij parlamentar nën kërcënim të vazhdueshëm,” shkroi Behrami.
Ai mohoi kategorikisht çdo lidhje të PDK-së me Listën Serbe dhe hodhi akuza të drejtpërdrejta ndaj kryeministrit Kurti dhe partisë së tij.
“Sa për tortë, kumbarët e Listës Serbe në Kuvend dihet kush janë. Është Kurti me VV-në që kërkojnë votën e fshehtë për të siguruar votën e Listës Serbe,” shtoi Behrami.
Ai u shpreh se Zyba nuk përfaqëson interesat e qytetarëve dhe e quajti atë “aksident politik”.
“Sali Zyba nuk është as befasia e seancës, as shqetësimi i opinionit – është, thjesht, një aksident politik që përfaqëson standardin më të ulët të përfaqësimit parlamentar në historinë e Kuvendit të Kosovës,” përfundoi Behrami.
