Kryeministri i Kosovës, Albin Kurti, gjatë vizitës së tij dyditore në Gjermani, ka zhvilluan një takim me bashkatdhetarët tanë në Berlin të Gjermanisë. Ai, të shtunën, ka marrë pjesë në kongresin e Partisë Socialdemokrate, që u mbajt në Berlin, ku është takuar me kancelarin gjerman, Olaf Scholz, dhe krerë të lartë të kësaj partie.
“Kryeministri, Albin Kurti, bashkë me nënkryetaren e Lëvizjes VETËVENDOSJE!, Mrika Limani Myrtaj, ministrin, Hajrulla Çeku, dhe kryetarin e Qendrës së Lëvizjes në Gjermani, Fahri Beqa, zhvilluan sot një takim me bashkatdhetarët tanë në Berlin të Gjermanisë”, njofton Lëvizja Vetëvendosje, nëpërmjet të një postimi në Facebook.
Bëhet e ditur se në këtë takim u diskutua për situatën politike në Kosovë, zhvillimet e fundit, si dhe u prezantuan të arriturat përgjatë këtyre dy vjet e nëntë muajve në qeverisje.
“Krahas miratimit të ligjit që ua mundëson bashkatdhetarëve votimin nëpër ambasada të Republikës tonë, kyçjes së të rinjve nga mërgata në Programin për Diplomaci, dhe investimeve që bashkatdhetarët kanë bërë në Kosovë, në këtë takim u fol edhe për rëndësinë e investimeve në sektorin e energjisë së ripërtrishme tash që është hapur ankadi. Mërgata jonë vazhdon të jetë motor qendror për zhvillimin ekonomik dhe demokratik të Republikës tonë”, njofton Lëvizja Vetëvendosje.
