Komisioni Qendror i Zgjedhjeve ka njoftuar se në Qendrën e Numërimit dhe Rezultateve po vazhdon procesi i rinumërimit të vendvotimeve të rregullta, ku deri në orën 16:00 janë rinumëruar 102 nga 185 vendvotime, sipas vendimit të KQZ-së.
Sipas KQZ-së, procesi i rinumërimit ka filluar në mëngjesin e së enjtes dhe përfshin vendvotime të rregullta që paraprakisht janë numëruar në Qendrat Komunale të Zgjedhjeve.
Në total do të rinumërohen 185 vendvotime, që përbëjnë 7.41% të 2,498 vendvotimeve të rregullta ku është zhvilluar votimi më 7 qershor 2026.
Vendimi për rinumërim është marrë në bazë të Rregullores Zgjedhore për funksionimin e QNR-së, e cila i jep KQZ-së mundësinë të vendosë për rinumërim pas vlerësimit të situatës.
KQZ ka bërë të ditur se kjo masë kontrolli është ndërmarrë për të adresuar problemet e evidentuara në disa Qendra Komunale të Numërimit dhe për të siguruar saktësinë e procesit të numërimit të votave.
