Kryeministri Albin Kurti, nëpërmes një postimi në llogarinë e tij në facebook, ka treguar për takimin që ka pasur me disa nga kryetarët dhe nënkryetarët e Komunave të Kosovës. Kuri, në postimin e shoqëruar edhe me disa fotografi, ka thënë se në këtë takim mbajtur në Prevallë, diskutuan në dy sesione,vpër të drejtat dhe drejtësinë, tjetri për ekonominë dhe financat, raporton Kosovanews.
Postimi i plotë i kryeministrit Kurti.
Dy sesione diskutimesh në Prevallë me kryetarët e komunave të Kosovës. Njëra për të drejtat dhe drejtësinë, tjetri për ekonominë dhe financat.
Të drejtat e njeriut, ato civile dhe të pakicave e bëjnë shoqërinë bashkë. Ashtu sikurse liria që nuk dhurohet por fitohet, as drejtësia nuk jepet, por duhet të vendoset. Po punojmë që ta ndërtojmë një sistem që vendosë drejtësi të bazuar vetëm në ligj. Nuk mund të ketë individë më të fuqishëm se shteti, as grup më të fuqishëm se Republika, e rrjedhimisht asnjeri mbi ligjin apo anash tij.
Gjithashtu, si rezultat i rritjes rekord të të hyrave buxhetore, Granti i Përgjithshëm për vitin 2023 është miratuar nga Komisioni i Granteve me një rritje prej 32%. Pra, kemi rreth 255.2 milionë euro më shumë buxhet të ndarë nga niveli qendror për nivelin komunal. E në këtë Komision miratuam edhe politika të reja si angazhimi i 59 konsulentëve të karrierës në shkollat e mesme të ulëta, rritjen e numrit të asistentëve për fëmijët me nevoja të veçanta në 500, shtimin e 30 profesionistëve të TI-së, shtimin e 299 profesionistëve në shëndetësinë primare dhe mundësimin e realizimit të vizitave për gra shtatëzëna e fëmijë dhe persona në kujdesin paliativ.
Dëgjuam me vëmendje krerët e komunave dhe regjistruam me kujdes çështjet, kërkesat dhe nevojat e tyre. /Kosovanews/
