Në konferencën “Një komunitet pa varësi”, kryeministri në detyrë, Albin Kurti tha se një komunitet pa varësi është mision kombëtar. Ai tha se nuk mund të pranojnë që varësia të bëhet realiteti i hidhur i rrugëve, i shkollave apo i familjeve në Kosovë.
“Jemi mbledhur sot për një beteje të përbashkët, betejë për jetën, për dinjitetin dhe për të ardhmen e fëmijëve. Një komunitet pa varësi është mision kombëtar që na thërret të gjithëve pa përjashtim. Jemi këtu bashkë, sepse së bashku po angazhohemi për një shoqëri të mirë ku çdo fëmijë dhe çdo i ri do të ketë mundësinë të jetojë me dinjitet dhe me shpresë”, deklaroi kreu në detyrë i qeverisë në konferencën e organizuar nga Zyra për Qeverisje të Mirë në kuadër të Zyrës së Kryeministrit në partneritet me Koalicionin e OJQ-ve për Mbrojtjen e Fëmijëve, Trust Circle Foundation dhe organizatën Labyrinth.
Tutje Kurti tha se Qeveria e Kosovës e ka të qartë se lufta kundër varësisë kërkon qasje gjithëpërfshirëse dhe të bashkërenduar që, sipas tij, fillon nga parandalimi, vijon me edukimin e ndërgjegjësimin, ofron mbështetje psiko-sociale dhe shëndetësore me qëllim të zvogëlimit të dëmit për ata që marrin drogë dhe garanton rehabilitim e ri-integrim dinjitoz në shoqëri.
“ Jemi të përkushtuar në zbatimin e strategjisë shtetërore kundër drogave 2024-2028 si një nga prioritetet për mbrojtjen e shëndetit publik. Përmes kësaj strategjie kemi përcaktuar masat e qarta që kombinojnë luftimin e zinxhirëve të shpërndarjes së drogave në forcimin e mekanizmave të edukimit në veçanti tek moshat e reja shkollore, por edhe parandalimin e rehabilitimin duke i pasur të gjitha këto në fokus. Ne po fuqizojmë policinë në luftën kundër shpërndarjes së substancave narkotike, ndërkohë po investojmë në qendra trajnimi dhe programe rehabilitimi për të rinjtë tanë”, deklaroi tutje shefi në detyrë i qeverisë.
Kurti tha se nuk mund të pranojnë që varësia të bëhet realiteti i hidhur.
“Ne nuk mund të pranojmë që varësia të bëhet realiteti i hidhur i rrugëve tona, i shkollave tona apo i familjeve tona. Kjo është një betejë që e fitojmë vetëm së bashku institucionet, policia, komunat, shoqëria civile, mediat, shkollat, prindërit dhe vetë të rinjtë. Sot bëjmë thirrje për një front të bashkuar e të palëkundur kundër varësisë. Vetëm një komunitet i vetëdijesuar, i angazhuar dhe aktiv mund të krijojë të ardhme të lirë nga varësia” deklaroi Kurti në këtë konferencë.
Ndërkohë, Remzije Krasniqi, presidente e Bordit Drejtues të KOMF-it, tha se viteve të fundit fëmijët dhe të rinjtë, përdorues të substancave narkotike janë ndër tre kategoritë më të cenueshme.
“Fatkeqësisht kjo kategori e fëmijëve shpesh është në hije për shkak të mungesës së plotë të qasjes në shërbime sociale, shëndetësore, rehabilituese, por edhe stigma dhe paragjykimi që e kanë në shoqëri”, tha ajo.
