Kryeministri i Kosovës, Albin Kurti, ka përkujtuar sot dëshmorin e Ushtrisë Çlirimtare të Kosovës, Asllan Fazliu, në 27-vjetorin e rënies së tij.
Kurti rikujtoi se më 23 mars të vitit 1999, Fazliu ra dëshmor gjatë luftimeve me forcat serbe në malet e Qyqavicës, duke e cilësuar atë si një nga figurat që mishëronte idealin e luftëtarit të lirisë.
Ai theksoi se, ndonëse vetëm 35 vjeçar, Asllan Fazliu mbetet simbol i një gjenerate luftëtarësh të UÇK-së, duke e radhitur atë përkrah emrave të njohur si Adem Jashari, Hamëz Jashari, Fehmi Lladrovci dhe Ilaz Kodra.
Sipas kryeministrit, Fazliu kishte marrë nofkën “Luan”, duke reflektuar trimërinë e tij në luftë. Kurti shtoi se Fazliu ishte gjithashtu dëshmitar i rënies së dëshmorëve Xhevë Lladrovci dhe Fatime Hetemi në shtator të vitit 1998.
“Dëshmitar i rënies heroike të dëshmorëve Fehmi e Xhevë Lladrovcit dhe Fatime Hetemit më 22 shtator 1998, Asllan Fazliu ra dëshmor gjashtë muaj më vonë i qëlluar nga një predhë topi, në luftë me forcat e Serbisë”, tha Kurti.
Kurti kujtoi edhe sakrificën e familjes Fazliu, ku pas rënies së Asllanit, vëllai i tij Mehdi Fazliu vazhdoi luftën deri në rënien e tij në prill të vitit 1999, ndërsa më pas dëshmor ra edhe xhaxhai i tyre, Milazim Fazliu.
“Lavdi Asllan Fazliut, mes të gjithë dëshmorëve të rënë për lirinë e Kosovës”, ka përfunduar Kurti.
