Kryeministri i Kosovës, Albin Kurti, ka reaguar sërish ndaj sulmit të fundit në zonën e Ibër-Lepencit, duke ngritur shqetësime për përfshirjen e aktorëve të huaj në këtë incident.
Ai ka thënë se të arrestuarit janë të lidhur me organizatën “Mbrojtja Civile”, e cila financohet dhe mbështetet nga Beogradi.
Në një postim në platformën X, Kurti ka theksuar se armët dhe eksplozivët e sekuestruar përfshinin shenja ushtarake që lidhen kryesisht me forcat serbe dhe ruse, duke përmendur veçanërisht Forcat Ajrore Ruse (VDV).
Pas sulmit terrorist të së premtes në mbrëmje, mes armëve dhe eksplozivëve të sekuestruar, u gjetën edhe shenja ushtarake. Shumica dërrmuese e tyre i përkisnin Forcave të Armatosura Serbe dhe Ruse, si Forcave Ajrore Ruse (VDV). Lidhjet e personave të arrestuar me organizatën terroriste “Mbrojtja Civile” e sponsorizuar nga Beogradi tregojnë praninë e aktorëve të huaj”, shkroi ai.
Ai gjithashtu rikujtoi aktivitetet paramilitare serbe në veri të Kosovës vitin e kaluar dhe sponsorizimin e vazhdueshëm të krimit nga Serbia si një faktor kryesor destabilizues.
“Natyrisht, ngjarjet terroriste nuk ndodhin në vakum. Në këtë kontekst, inkursioni paraushtarak i Serbisë vitin e kaluar dhe sponsorizimi i vazhdueshëm i krimit përmes metodave të ndryshme në veri të Kosovës lë pak hapësirë për spekulime”.
Kryeministri theksoi se hetimet janë ende në vazhdim dhe se do të publikohen detaje të mëtejshme për përfshirjen e aktorëve të huaj.
“Megjithatë, hetimi është në vazhdim, dhe detaje të mëtejshme – së bashku me numrin e palëve të huaja të përfshira – do të zbulohen”, ka shkruar Kurti në platformën X.
