Kryeministri Albin Kurti ka thënë se janë 30 milionë euro mall i konfiskuar e 14 milionë euro të sekuestruara nën dyshimin e keqpërdorimeve dhe shpëlarjes së parave.
Këtë shifra dhe të tjera, Kryeministri i ka dhënë në një fjalim partiak të shtunën në Prishtinë, ku ka folur për progres në kornizën legjislative për drejtësi.
“Prej fillimit të mandatit deri tash, 30.6 milionë euro mall janë konfiskuar nga operacionet e Doganës së Kosovës. 34 rrugë ilegale janë mbyllur, prej tyre 26 në veri të vendit. 16 laboratorë të drogës janë shkatërruar, 9 prej tyre po ashtu në veri. Mbi 2.2 tonë substanca narkotike janë konfiskuar dhe mbi 14 milionë euro janë sekuestruar nën dyshimin e keqpërdorimeve dhe shpëlarjes së parave”, ka thënë Kurti në tubim partiak.
Sipas tij me zbatimin e ligjeve të miratuara do të kalojë në një nivel tjetër lufta kundër korrupsionit te zyrtarët e lartë politikë.
“Sivjet kemi shënuar progres të dukshëm edhe në kornizën legjislative për drejtësi. Amendamentet kushtetuese dhe Projektligji për Vetingun në Drejtësi u finalizuan. Janë miratuar Ligji për Byronë Shtetërore për Verifikimin dhe Konfiskimin e Pasurisë së Pajustifikuar dhe Ligji i ri për Prokurorinë Speciale të Kosovës për luftën kundër korrupsionit. Me zbatimin e këtyre ligjeve, lufta jonë kundër korrupsionit, sidomos në sistemin e drejtësisë dhe mes zyrtarëve të lartë politikë, do të kalojë në një nivel edhe më të lartë”, ka shtuar ai.
Sipas tij, progresi në fushën e drejtësisë është konfirmuar edhe nga vëzhgues të pavarur ndërkombëtarë.
“Gjatë mandatit tonë, jemi përmirësuar për 20 vende në Indeksin e Luftimit të Korrupsionit të Transparency International dhe 22 vende në Indeksin e Lirisë së Mediave të Reporters Without Borders. Jemi të parët në Ballkanin Perëndimor për Demokraci Elektorale sipas V-Dem Institute, si dhe të parët në Ballkanin Perëndimor, të dytët në Evropë dhe të tretët në botë për përmirësim në të drejtat politike dhe liritë civile sipas Freedom House”, ka deklaruar Kurti.
Ai ka thënë se efektet në fushën e drejtësisë kanë dhenë rezultate edhe në ekonomi pasi ka edhe pagesa të tatimeve më shumë nga qytetarët.
