Kryeministri i vendit, Albin Kurti pas mbledhjes së Këshillit të Sigurisë Kombëtare në një konferencë për media ka thënë se veprimi i djeshëm i Serbisë ishte veprim agresor, të cilët rrëmbyen tre zyrtarë të policisë në brendi të territorit të Kosovës.
Gjatë konferencës për media të mbajtur pas mbledhjes së Këshillit të Sigurisë të enjten, Kurti u është përgjigjur të gjitha pyetjeve të gazetarëve.
E kryeministri është pyetur nga një gazetare nëse tre policët e rrëmbyer nga Serbia do të lirohen me kushtin që të lirohet i dyshuari Milun Milenkoviq “Llune”, i cili u arrestua të martën për sulmet ndaj KFOR-it dhe për disa vepra të ndryshme kriminale.
Në këtë rast, Kurti tha se i arrestuari me nofkën, “Lune” nuk është kriminel as më 26 maj e as më 29 maj.
Kryeministri Kurti shtoi se ai ka tashmë një dosje të trashë të shkeljeve ligjore për krimet e kryera në Kosovë dhe se nuk mund të krahasohen këto dy raste.
“Tash, ne e kemi një kriminel serb si ‘Llune’ që nuk është bërë kriminel më 26 maj e as më 29 maj. Por, ka dosje të trashë të shkeljeve ligjore të veprave penale të krimeve të kryera në Kosovë. Në Kosovë ka sundim të ligjit, ka republikë demokratike. Është e vërtete që arrestimi i Llunes i ka hedhur në panik të gjithë kriminelët, ata nuk mund mundur ta imagjinojnë se ai mund të arrestohet, s’e kanë besuar”.
Ai shtoi se në Kosovë ka sundim të ligjit por jo edhe pazare, ndërsa i ka dhënë një sugjerim gazetës që shtroi këtë pyetje.
“Nuk krahasohen këto raste, te ne ka sundim të ligjit, nuk ka pazare. Nuk di që Beogradi ka kërkuar ndonjë shkëmbim, ju s’e di pse e thoni. S’keni nevojë të paraqitni një kërkesë të Beogradit karshi republikës demokratike. Për çfarë shkëmbimi, kush e ka kërkuar atë? Ju jeni gazetare, mirëpo kur flisni, ua kisha sugjeruar, mos flisni në emër të Beogradit zyrtar, sepse s’i kontribuoni as lirisë së medias as sigurisë në Kosovë”.
“Tre policët që janë rrëmbyer dhe kidnapuar nga njësia speciale ushtarake e Serbisë “Kobra” dhe nga njësia anti-terror kanë qenë aty në një rrugë që ishte ilegale. Pikërisht, policët që merren me parandalimin dhe ndalimi ne kontrabandës dhe përpara tyre kanë pasur njësitet e specializuara të Serbisë”, shtoi Kurti gjatë konferencës së mbajtur pas mbledhjes së Këshillit të Sigurisë.
