Ministri i Punëve të Jashtme i Sllovakisë, Rastislav Kaçer në lidhje me takimin e 27 shkurtit në Bruksel është shprehur i lumtur që ka pasur gatishmëri të kryeministrit të Kosovës, Albin Kurti dhe presidentit të Serbisë, Aleksandër Vuçiq për të vazhduar me zbatimin e propozimit evropian.
Përmes një postimi në Twitter, Kaçer ka thënë se tani nevojitet punë e vështirë.
“Gëzohem që dëgjoj lajme pozitive nga Bruksel. Përshëndes gatishmërinë e shprehur të Aleksandar Vuçiqit dhe Albin Kurtit për të vazhduar me propozimin e BE-së. Duhet punë e vështirë tani”, ka thënë Kaçer.
Ndryshe, Zyra e Kryeministrit në një komunikatë për media ka dhënë detaje për takimin e 27 shkurtit në Bruksel, ku theksohet se Kosova është treguar e gatshme të nënshkruajë “Marrëveshjen Bazë ndërmjet Kosovës dhe Serbisë”, por që nënshkrimi është refuzuar nga Serbia.
Tutje thuhet se, edhe pse Serbia nuk është treguar e gatshme ta nënshkruajë propozimin, palët do të nisin bisedimet për planin e zbatimit.
“Palët do të fillojnë bisedimet për planin e zbatimit. Ky plan duhet të përmbajë detaje konkrete dhe të jetë gjithëpërfshirës, të ofrojë efektivitet në zbatim dhe të jetë i sekuencuar në mënyrë të balancuar”, thuhet tutje.
Po ashtu, thuhet se marrëveshja e arritur në këtë takim është mes palëve që e njohin njëra-tjetrën si të barabarta, dhe është arritur mbi bazën e respektimit të barazisë sovrane të shteteve, respektimit të pavarësisë, autonomisë dhe integritetit territorial të tyre.
Takimi i radhës i nivelit të lartë politik pritet të mbahet gjatë muajit mars.
Glad to hear positive news from #Brussels. ?? I welcome the expressed readiness of @predsednikrs Vucic & @albinkurti to proceed w/ implementation of the EU Proposal. Hard work needed now. Our support to @JosepBorellF & @MiroslavLajcak activities on #EU’s behalf.@SlovakiaMFA ??
— Rastislav Káčer (@RastislavKacer) February 28, 2023
