Ambasada e Mbretërisë së Bashkuar ka organizuar, sot, ceremoninë e Ditës së Përkujtimit të Mbretërisë së Bashkuar në Prishtinë.
Me këtë rast janë përkujtuar të gjithë ata që humbën jetën gjatë shërbimit të tyre me Forcat e NATO-s në Kosovë.
Në këtë ceremoni krahas ambasadorit Nicholas Abbott, kanë marrë pjesë edhe kryetari i Kuvendit të Kosovës, Glauk Konjufca, ministri i Mbrojtjes, Armend Mehaj, komandanti i FSK-së, Bashkim Jashari si dhe lideri i AAK-së, Ramush Haradinaj, të cilët kanë bërë homazhe tek memoriali kushtuar ushtarëve të Mbretërisë së Bashkuar të rënë në misionin e tyre paqeruajtës në Kosovë.
“Është me rëndësi t’i kujtojmë të gjithë ata që kanë bërë sakrificën e madhe, jo vetëm ata që kanë humbur jetët e tyre por edhe ata që kanë shërbyer në operacione ushtarake në Kosovë“, ka theksuar Benjamin Ingham, nënkolonel i ushtrisë së Mbretërisë së Bashkuar në kuadër të KFOR-it.
Kurse me një postim në Facebook, ministri i Mbrojtjes së Kosovës, Armend Mehaj tha se kontributi i ushtarëve britanez për ruajtjen e paqes kudo që vlerat demokratike kërcënoheshin përbën një akt heroik, për të cilin ndjejmë mirënjohje secili prej nesh.
“Roli i Forcave Britaneze ka qenë kyq dhe i pazëvendësueshëm edhe në luftën e fundit në Kosovë, por mbi të gjitha mbështetjen e Mbretërisë Britaneze, institucioneve dhe ushtrisë së saj vazhdojmë ta ndjejmë edhe tani. Forca e Sigurisë së Kosovës bashkëpunon me Forcat e Ushtrisë Britaneze në secilin nivel, në shkollime e trajnime, ngase kemi një mision të përbashkët, ruajtjen e paqes dhe stabilitetit në vend, rajon dhe më gjerë. Mirënjohje për ambasadorin Abbott, dhe për çdo ushtarë britanez që shërben në Republikën e Kosovës, ka shkruar Mehaj.
